「Yahoo搜尋人氣大獎2017」頒獎禮今晚喺尖沙嘴舉行，當中馬國明憑《降魔的》勇奪「人氣電視男角色」。


接受訪問時，馬明講到得獎感受，佢話：「好開心，攞角色獎，證明自己作為演員做出嚟嘅嘢有人睇到。」問到佢有冇信心贏視帝，馬明就話：「一路都冇，o依家都冇。你知啦，新加坡攞完又唔同馬來西亞，就今晚攞完又唔同台慶有得攞。」問到佢得獎有冇同心穎BB報喜，馬明就話第一個已經同佢講咗：「佢仲叫我enjoy the party。不過仲話有同其他人講，唔係所有嘢都同佢講，唔會食餐飯都同佢報告。佢都唔係乜都要報告。」馬明又話心穎BB o依家開緊劇好忙，未有時間食飯慶祝。


講到客串《Do姐再Shopping》，馬明就話其實佢「刷鞋仔」嘅角色係同農夫傾好，而對方同Do姐有豐富合作經驗，始終有默契好多。


同場仲有憑電影《29+1》獲得「本地電影」嘅周秀娜、彭秀慧、Babyjohn。其中周秀娜仲獲得「最具號召力女藝人」，而佢今晚仲以性感see through現身，就連拍檔Babyjohn都話唔敢直視。問到娜姐點解唔真空，彭秀慧就話：「呢個問題我都有問佢。」娜姐就話o依家個年齡身體要緊，而今晚活動喺海邊舉行好大風好凍咁話：「不過唔代表以後都唔性感，要睇劇本、睇尺度。」娜姐仲話今年拍咗一套電視劇三套電影，問到佢嚟緊要唔要休息，佢就話拍得開心可以繼續拍唔使休息咁話。


另外，網劇《反黑》奪得「人氣網劇」，而劇中由張建聲飾演嘅招志強仲獲得「人氣網劇角色」，佢同導演宋本中、演員陳雅婷一齊攞獎。張建聲仲話：「入行六年，今次終於有個獎可以送俾爸爸。」



馬國明憑《降魔的》勇奪「人氣電視男角色」。問到佢得獎有冇同心穎BB報喜，馬明就話第一個已經同心穎BB講。周秀娜、彭秀慧、Babyjohn為電影《29+1》領獎。
周秀娜仲獲得「最具號召力女藝人」，佢仲以性感see through現身。宋本中、陳雅婷、張建聲