郭富城今晚喺中環出席品牌活動，佢話自己原來今朝先趕返香港，佢話：「喺廣州仲忙緊拍《風再起時》，今次都好辛苦，成日要轉髮形、轉造型，因為要由30歲演到70歲，經常要轉妝，拍攝唔同嘅年代，轉一個頭要個半鐘、化妝要兩個鐘，拍攝時間都好長，不過今次好多內心戲，好多發揮嘅機會，大概拍到月中左右，自己都唔係好捨得個角色，噚日連續拍咗19個鐘，拍到朝早，之後就趕返嚟。」
咁有冇把握時間見吓囡囡Chant？城城話：「有，當然有掛住BB啦！聽日要去上海攞個獎，但唔講得住……」城城又趁機轉話題：「今次同偉仔合作，對方係個好優秀嘅演員，大家都一齊練一樣嘢，因為要夾嘅，對我嚟講都幾難。」但練啲咩呢？城城又賣關子…
講到城城今次返大陸拍戲拍咗兩個幾月，問佢期間有冇返吓嚟香港探屋企人，同探吓囡囡？城城話：「今日有見到，成個人都溶化晒，因為o依家科技可以視像，相信因為工作冇辦法，家人一定會體諒。」
佢又提到自己喺大陸成立咗富盛車隊，嚟緊或者有機會以自己車隊名義作賽，參加Formula E賽事，問佢做咗爹哋之後參賽會唔會有顧忌？城城話：「唔理有冇家室都好，其實賽車運動本身都有危險性，不過都要注意安全，但始終喺賽道上賽車，比喺街道上安全，自己喺歐洲都有收藏啲賽車，有時間都會過去歐洲睇吓啲車，明年賽事自己未必有時間參與，因為安排咗拍戲，可能要再下一年先有機會參與。」
 （攝影：仇志德） |  城城話自己今朝先趕返香港 |  雖然講得少啲，但一提囡囡，城城坦承「溶化」咗。 |
 睇城城手勢就知佢心水有幾好 |
