你的名字，我的姓氏。
現年43歲的新城DJ「啤梨」葉文輝，今年7月向拍拖4年嘅圈外女友Michelle求婚成功，呢對準新人下周日（12月3日）先註冊，明年才補擺喜酒，未來半年仲會去台灣、韓國同日本三地影結婚相。
啤梨同未婚妻Michelle憧憬嘅婚禮完全唔同，Michelle想擁有一個Vintage主題嘅婚禮：「我鍾意復古嘢，當然想朝呢個方向去搞，但都要睇啱場地同婚期先，如果搞得成，希望賓客到時都以Vintage打扮出席。」啤梨自爆細個曾忽發奇想，夢想大個仔去無人荒島舉行婚禮：「只邀請至親出席，我哋可以喺個島度連續玩幾日。」鍾意跳舞嘅啤梨仲想搞跳舞派對，佢個dream wedding同未婚妻想法明顯冇交叉點，所以啤梨最後決定：「佢（Michelle）最想嘅夢想婚禮，想點我就晒佢。」
婚禮細節有待商量，啤梨趕緊為即將註冊做準備，佢哋日前拍拖去銅鑼灣一間珠寶店揀婚戒，Michelle睇見閃爆鑽飾即愛不釋手，其中睇中一枚重3卡、價值100萬嘅鑽戒，啤梨承諾係佢哋「紙婚」禮物，佢仲承諾以後每年結婚周年都送鑽飾，仲逐年加碼，啤梨話：「Michelle係我嘅動力，有呢個動力，我會搵多啲錢。如果可以o氹到佢開心，我都好有滿足感。」
揀完婚戒，啤梨怕Michelle攰，帶佢去大坑嘆紅酒relax下，啤梨話：「呢間餐廳好有意思，我求婚行動喺呢度開『秘密會議』，約幫手啲朋友嚟呢度分配工作，好有回憶。Michelle好鍾意飲紅酒，我以前滴酒不沾，係佢教我飲，原來係一種享受。」
訪問中，啤梨對Michelle嘅貼心送暖，到底值幾分？如果5分滿分，Michelle畀啤梨4.5分：「睇下邊度再加畀佢，梗係唔好畀滿分，等佢有進步空間。」啤梨聽完分享前一晚閨房小秘密：「噚晚Michelle太攰，半夜瞓瞓吓醒咗，我都起身陪佢，等佢再瞓着我先瞓，因為我有零秒即可瞓着嘅功能。」啤梨講完，Michelle自動波加佢0.1分，距離滿分又近咗，相信到結婚日，啤梨就達標做完美老公。
 攝影：陳俊強、攝錄：廖達燊 |  新城DJ「啤梨」葉文輝同拍拖4年嘅圈外女友Michelle下周日（12月3日）先註冊，明年才補擺喜酒。 |  佢哋日前拍拖去銅鑼灣一間珠寶店揀婚戒。 |
 |  揀完婚戒，啤梨怕Michelle攰，帶佢去大坑嘆紅酒relax下。 |  |
 |  訪問中，啤梨對Michelle嘅貼心送暖，到底值幾分？如果5分滿分，Michelle畀啤梨4.5分。 |
