甄子丹夫婦、汪圓圓、呂良偉夫婦、萬希泉創辦人沈慧林（William）同鄧鉅明夫婦等，今日喺灣仔出席慈善午宴，由呂良偉嘅畫作設計成嘅腕錶並作慈善拍賣，4隻錶拍賣得逾200萬，部份款項將撥捐慈善機構，其中紀曉波母親同甄子丹分別以38萬及58萬8,000投得心頭好，子丹即場將錶送畀太太汪詩詩，子丹話：「大家知我好慳儉，好少買奢侈品，10年都冇買過錶，今次係好朋友設計，太太屬雞，加上做慈善，一舉兩得。」


之前喺佛山電影節奪終身成就獎，子丹話：「終身成就獎係得高望重嘅，唔敢當，我只係有少少貢獻，係終身鼓勵。」提到惠英紅前日奪得金馬影后（新聞連結：http://bit.ly/2ibabF4），子丹就話好戥佢開心，覺得實至名歸。子丹透露正監製兩部電影，噚日佢仲陪來港度假嘅泰國武打明星好友Tony Jaa去飲茶。


而汪圓圓預告聖誕節會同埋家姐兩家人去炎熱嘅地方度過，但姐夫子丹好難夾時間，子丹話正度期配合。圓圓又提到照顧家庭好忙，加上生完BB冇記性，佢話：「聽日係結婚周年，原來係4年我都唔記得，時間過得好快，本身聽日食飯，但係我一早約咗人，所以要改今晚，生完記性真係差咗。」問老公蔡加讚有冇投訴？圓圓就話：「佢都算OK，之前佢唔見咗隻結婚戒指，半年後先搵返，我都冇嬲。」圓圓又話甚少過二人世界，但希望每個月都有一次。講到佢姑奶蔡加怡做主席嘅上市公司康健醫療今日被停牌（新聞連結：http://bit.ly/2i90EhW），圓圓話：「我冇留意，但我唔擔心，佢哋會handle到，會問候佢。」


呂良偉對拍賣成績好滿意，今次陀飛輪係佢自家品牌嘅首系列產品，佢話：「我畫嘅畫個個朋友都話鍾意，不過我唔捨得賣，老婆就諗到不如將佢哋製成陶瓷同花樽，希望下次有場合可以做慈善。」而呂良偉太太屬雞，佢嘅作品多數都係畫雞，所以都o氹得太太好高興。


另外，鄧鉅明就自嘲冇藝術天份，鄧太就笑話要等佢畫一幅靚嘅人像，就要等下一世，相反，鄧太自細都有畫山水畫同素描，阿仔都有遺傳佢嘅藝術天份，可惜近年鄧太都好忙，冇時間畫畫，不過就希望10年後可以悠閒啲，專心畫畫陶冶性情，未來希望有開畫展嘅一日。而今次活動搞手、萬希泉老闆William就覺得今次拍檔呂良偉嘅藝術感好強，佢哋係喺上年《風雲》舞台劇時認識，今次能夠合作，又可以做慈善，都好開心。


（攝影：陳慧安）汪詩詩手上嗰隻名為「吉利彩雞陀飛輪—印鈔雞」嘅錶，係由老公子丹以58.8萬投得。呂良偉將畫作轉到腕錶上，再作慈善拍賣。
汪圓圓話聖誕節會同家姐一家去旅行蘇永康（左二）、沈慧林（右）張玉珊
羅霖、琦琦鄧鉅明夫婦