入行30年嘅周慧敏(Vivian)，明年1月會喺紅館舉行紀念演唱會，日前佢接受ViuTV節目《interviu》訪問。
身為「玉女掌門人」嘅Vivian，竟然喺節目入面話自己其實係醜小鴨喎！唔知大家又信唔信呢？
Vivian話，記得自己細個嘅時候，曾經試過好短頭髮，短嘅程度係比男仔頭更男仔嘅短髮，佢話其實係阿媽迫佢剪嘅。Vivian話，記得讀小學嘅時候，自己係孖辮妹，到咗發育時期，唔知點解會變咗鬈髮，好似啲黑人咁嘅鬈髮。佢話：「因為唔識打理，於是就再剪短頭髮，再加上膠框大近視鏡。」Vivian就形容自己根本同個「靚」字全扯唔上關係，直至入咗娛樂圈，先開始識得打扮。
訪問入面，Vivian講到俞琤，佢話：「85年參加完新秀歌唱比賽，俞琤係我第一個伯樂，係佢搵我拍戲，而我當時好坦白咁講，我對演戲有恐懼，佢好明白知道我喜歡唱歌，就安排我去唱片公司試音，而試音竟然成功，但又過唔到媽媽嗰一關！所以就冇即時做歌手，繼續讀書。」
談到未來嘅工作計劃，Vivian就話，佢將會放更大比重喺家庭方面，同埋佢亦好專注自己嘅信仰生活，Vivian反而覺得自己嘅演藝事業要隨緣，有感動位先會去做，如果要佢付出太多家庭時間，佢就未必會做，因為佢覺得自己係人家嘅老婆，兼且佢要照顧屋企嘅貓。講到屋企，當然要問吓佢老公倪震啦，Vivian話倪震一直都好用心照顧佢，所以佢亦希望學習照顧老公，盡量做好妻子嘅責任。
 初入行嘅Vivian(資料圖片) |  (資料圖片) |  (資料圖片) |
 Vivian大讚老公倪震一直都好用心照顧佢。 |  Vivian將於明年一月舉行演唱會。 |  Vivian日前接受ViuTV節目《interviu》訪問。 |
