劉嘉玲、何超瓊、何超蓮、楊政龍、鄧紫棋（G.E.M.）、林建岳等今日喺中環愛丁堡廣場為「光.影.香港夜」主持開幕典禮，之後佢哋移師PMQ原創方出席活動嘅慈善晚宴。
超蓮受訪時講到後日（25日）係爹哋賭王何鴻燊96歲生日，問到打算點慶祝，超蓮話都係喺屋企慶祝：「會喺屋企食蛋糕，好耐冇出街慶祝，唔想咁勞碌，屋企人夾一份買衫褲鞋襪，天氣凍想佢暖啲。會同爹哋打牌，佢日日都打，同埋有指定生日蛋糕。」超蓮仲透露賭王唔鍾意啲女嘅男朋友，問到賭王係咪唔想啲女嫁？佢話：「咁又唔好嫁唔出。」
講到佢前緋聞男友楊政龍都有喺度，超蓮話：「今日同場唔會尷尬，佢係我哥哥、好朋友嚟，唔好阻佢識女仔啦，我身邊啲異性朋友都好慘，就嚟同我絕交。」佢仲話嚟緊聖誕節會做慈善活動，出活動都有男有女，暫時未公佈人選。之後要求超蓮同楊政龍合照時，佢哋表現有少少尷尬，最後捉了一位男士3人合照。
更多娛聞，喺晒《娛果》
http://fb.com/appledailyent
 （攝影：沈健程） |  超蓮話後日會喺屋企幫爹哋何鴻燊慶祝生日 |  （左起）何超蕸、超瓊、超蓮 |
 超蓮個前緋聞男友楊政龍（左）都有同場，佢話話同場冇尷尬，但影合照前就拉其他人落水。 |  超蓮好姊妹G.E.M.都有現身 |  劉嘉玲短裙登場 |
 好搶眼 |
