《好心分手》、《三角誌》、《落地開花》係盧巧音(Candy)嘅悲情三部曲，10幾年前嘅盧巧音的確幾悲，愛情、健康、事業都走過高山低谷，5年前盧巧音才驚覺自己有抑鬱，更不幸的是，原來老公蘇浩才(Sammy)@Kolor同時患上抑鬱，兩公婆一齊共同度過，曾因病激瘦至90磅嘅盧巧音：「我想話有病唔係好羞家一件事！」
已走出陰霾嘅盧巧音再現歡顏積極工作，將於下月20及21日喺旺角麥花臣舉行《RE:TURN演唱會》：「明年20周年，但我等唔切，好想今年之內做啲嘢。」悲情三部曲唔止大家想聽，佢都好想唱：「啲歌詞都夭o架，以前經歷up and down，浮浮沉沉，但結咗婚再唱呢啲歌，就算唱番《好心分手》，以前好悲哀呢個感情，o依家係換咗一個態度，變咗正能量嘅歌，意思係分手都唔係好差啫。」
《好心分手》雖然帶給盧巧音成功，卻將佢推入人生低潮：「攞完獎之後，身體同心理唔係好得，呢啲唔開心同壓力係積番嚟，呢個低潮時間有十年，最嚴重個人好冇動力，出街坐車突然好驚好不安，心跳得好快，透唔到氣，又好鍾意買嘢，但買完返屋企會唔開心，又瞓唔到覺，12年發覺自己有問題就去睇醫生，睇咗3年，我想話有病唔係好羞家一件事，心靈唔舒服都要醫生幫你。」
問到Sammy點樣幫老婆？盧巧音驚爆老公同患抑鬱：「佢喺我側邊已經ok，其實嗰段時間我哋都有一樣嘅病，精神上唔係幾安穩，一齊去睇醫生，大家互相鼓勵同提點，如醫生叫唔好飲咁多酒，我會提佢飲少啲，用夫妻感情去對付呢個病，兩三年時間好番晒，喺陰霾跳番出嚟靠運動，之前自己左腳有舊患，行得快都痛，老公叫我做運動，做完出汗好舒暢，發現舊患冇咗，好開心，有少少含淚感覺。之前因為情緒唔好，食咗都唔吸收，最瘦90幾磅，o依家ok，以前甩頭髮、眼睛問題都冇晒。」
再唱《好》會唔會諗番同舊愛余文樂嘅一段情？佢開朗說：「唔會囉，諗番以前係嘥時間，不如向前看。」兩人仲有冇再聯絡？盧巧音坦言：「冇乜必要刻意，再見到會say hello，始終都係朋友，就算之前點都好，我會珍惜呢段緣份，大家相識過共同度過一啲嘢，我唔會話唔再諗，有時都會諗吓，但角度唔同咗，諗番起感覺．．．青春囉，每一個青春都有迷惘同荒誕，我都後生過，我都瘋狂過。」
同Sammy結婚4年，盧巧音用《亂世佳人》呢首歌形容：「比想像中開心，婚後自己性格改咗啲，雖然某程度上都係咁火爆剛烈。o依家生活好warm，充滿光芒，當情緒唔好，睇乜都係灰色，好番好似喺窿爬番出嚟，feel到朋友嘅愛、家人嘅慰問，積極工作，獎項對我冇乜所謂，之前執屋啲獎都丟，鼓勵唔係望住獎，係心入面。遺憾當年攞獎之後情緒唔好，好多嘢唔夠落力，所以o依家更加勤力。」
