2015年，竇靖童首次現身香港舞台，喺Clockenflap獻聲，唱咗7首由她作曲嘅英文歌如《Blue Flamingo》、《My Days》等，表現淡定，越唱越放，又笑又揮手，亦自彈電結他，聲線勁似阿菲。

事隔兩年，噚晚，童童又去咗Clockenflap——不過今次係做觀眾，仲帶埋忘年交大陸影后周迅睇騷，兩人戴cap帽低調現身，但都被觀眾發現影相兼拍片貼微博，周迅表現好鬼high，搓肚仔彈彈跳，童童就un身un勢。周迅係李亞鵬嘅前度，李亞鵬又係童童嘅過氣後父，兩女打埋算盤都算有啲關係。

上月周迅踏入43歲生日，童童親到浙江為周迅慶祝，兩人雖然相差23歲，但完全冇代溝，喺餐廳開p嘅壽星女見到童童出現，開心到飛起，兩人又食又傾仲一齊煲煙㖭，周迅更出手為童童整理頭髮，當足佢係囡囡咁愛鍚，兩人離去時同友人道別後，童童就跟周迅返屋企休息。



兩個同李亞鵬都有關係的人，成為忘年之交