韓國「國民初戀」秀智跟「長腿oppa」李敏鎬，前年3月大方認戀情，不過日前兩人驚爆分手，結束近3年情。分手後雙方事務所都唔肯透露分手原因及日期，強調係私人事，不過二人會以同事身份繼續為對方打氣。
由於二人被視為圈中金童玉女，但最終分手收場，唔少人都大嘆可惜。雖然兩人拍拖以來僅被拍得一次約會，之後亦多次傳出感情生變，但每次佢哋都否認消息，力證感情冇問題，秀智亦曾承認同李敏鎬最少一個月約會一次，所以突然爆出分手，都令外界好驚訝。
而事件喺韓媒方面來說都係大消息，有韓媒仲翻炒二人過往拍拖時被途人目擊拍拖過程，據了解當時仍然係熱戀期嘅秀智同李敏鎬，原來唔似普通情侶一樣，每次出外食飯都由男方俾錢，反而佢哋雙方都好豪爽搶住俾錢，有時為免搶贏傷感情，佢哋更索性玩猜包剪揼來決定邊個埋單。而個次被目睹兩人爭埋單時，據知嗰餐嘅數目要40萬至50萬韓圜(約2,840-3,550港元)，因為兩人爭住俾錢，所以先令其他食客留意到，最終亦由秀智猜贏。
