台慶劇《降魔的》講馬國明係一個的士司機，遇上胡鴻鈞呢個精靈，就咁睇就似係一個講降魔嘅膠劇，但喺啱啱過咗嘅一星期，呢套劇就被網民大讚，點解？

劇中馬明揸的士有兩個常客，就係金剛同小儀，頭一個星期睇，以為佢哋只係配角，得閒出場帶動下馬明條感情線咁，但點知佢哋兩個係一條大伏線，去到第11集先揭曉金剛同小儀係馬明已經過身嘅父母，即係兩人其實係鬼，當呢場戲一出，好多網民都睇到嘩一聲，仲讚大台留伏線留得好。呢11集期間，都好多提示話佢兩個係鬼，例如金剛話成日都截唔到的士，啲司機好似睇唔到佢咁，因為佢哋係鬼嘛，所以真係睇唔到佢哋。

除咗伏線被讚之外，馬明嘅演技都深受網民認同，好多網民都話想馬明今年可以拎到視帝。

金剛同小儀成日截唔到的士，但馬明就見到佢哋。（劇照）鋪足11集，原來佢兩個已經係鬼。
馬明仲查到，佢哋就係親生爸爸媽媽。等咗11集終於相認。