胡杏兒今晚現身尖沙嘴海港城，出席MONCLER旗艦店開幕活動，今日係杏兒產後首個復出嘅工作，大會安排佢身穿白色連身裙，問到佢收身成績如何，胡杏兒就話：「仲差少少爭幾磅，剛坐完月呢個係首個復工工作，因為品牌邀請，老公都交畀我決定，自己都好怕悶，每日係屋企餵奶。」
問到杏兒初為人父母係咪好困身，佢就話：「一辛苦就瘦得快，3、4個鐘就要餵一次，都冇試過連續瞓多過幾個鐘，o依家餵母乳，肥膏同水都畀晒BB，BB滿月都有12磅。」今日係復出後首個工作，杏兒仲話出到嚟會掛住BB，不過佢就唔會全職工作：「長時間工作就唔得喇，半兼職自己鍾意做嘢。好佩服做媽咪嘅態度。」杏兒仲呼籲顧主畀多啲時間做媽咪嘅員工。
講到姚子羚等一班姊妹好，親眼睇住杏兒餵人奶仲話好感動，杏兒亦話唔介意公開open：「因為成班姊妹都咁Close，我又唔會介意佢哋見到我（餵母乳），但我驚嚇親佢哋啫，因為我好大！」
杏兒又話：「我其實都好想俾佢哋感受一下做媽媽係會點，咁我都想等佢哋ready啦，因為佢哋都會要經歷我經歷緊嘅嘢囉。」
問到有冇計過身材豐滿咗幾多，杏兒搖頭苦笑：「我冇計過，我冇量過。總之就大咗啦！」杏兒仲大爆老公湊仔叻過自己：「佢湊大姪仔姪女，識掃風同換片，得自己就識泵奶，冇老公湊仔咁熟手。」
 攝影：林賓尼 |  胡杏兒今日出席MONCLER旗艦店開幕活動，係佢產後首個復出嘅工作。 |  |
 周柏豪講到早前被拍亂泊車事件。 |  |  台灣男星王陽明。 |
 日本model Rola。 |
