張繼聰同方健儀今日喺九龍灣出席郵輪「世界夢號」活動，阿聰話啱啱去咗泰國家族旅行，體驗到分別要照顧一個要每小時食奶瞓覺，加一個唔使食同瞓嘅小朋友，笑言呢次係個好好嘅經歷。

問到係咪為咗老婆謝安琪復出，所以預先去個旅行放鬆吓？阿聰話：「佢係部署緊工作，開始工作就會好似以前咁，要互相向對方經理人攞期，交涉好耐。」佢仲話老婆o依家嘅精神狀態好好，集中做運動同食運動員餐單，好佩服太太，仲話佢煥然一新，阿聰仲話有嘢要主動澄清：「我冇干涉或者禁錮佢，我哋開放式相處，支持佢，佢開始預備工作，密鑼緊鼓。」

提到無綫下令禁女藝人性感，阿聰一聽到就話：「哎呀，咁對我冇影響，o依家晚晚有阿mo(陳豪)同森美，我自我統計過，《老表，你好hea》入面，我應該係香港電視史上黃金時段露兩點最多、露出胴體最多嘅一個。」阿聰仲話自己都收到呢個訊息，佢話：「尊重電視台做法，要拿捏同平衡，有時劇情需要，沙灘着樽領又唔啱嘅。」問佢怕唔怕禁令實施喺男藝人身上？佢話：「真係咁都冇辦法，呢個諗法都好，因為電視台觀眾層面好廣，好多小朋友同後生，明白佢哋嘅關注，如果係男藝人就可暗呼一口氣，可以食飽飯。」佢仲笑言閒時會同個仔拎返啲自己裸露相出嚟睇。


更多娛聞，喺晒《娛果》
http://fb.com/appledailyent

張繼聰話老婆開始預備工作，密鑼緊鼓。攝影：林賓尼張繼聰今日出席郵輪活動。
方健儀