陳嘉倩被《蘋果》率先爆有金毛凸腩男友接載返工放工，仲去平民茶餐廳撐枱腳，嘉倩BB前晚出席活動承認兩人「發展中」。(相關新聞﹕http://bit.ly/2yAuYF6)
唔少宅男粉絲睇到呢單新聞，都會流住兩行眼淚講句﹕「這些機會......」
不過，嘉倩BB男友個底好似幾花，近日網上不停有人爆料，指男方名叫陳志遠。除咗同過無綫小花朱婉禎拍拖外，4年前又捲入借貸糾紛及持刀禁錮案。
03年，陳志遠曾被一名姓鄭嘅馬會餐廳經理入稟追討逾百萬欠款。當時女經理表示陳志遠自稱係貨運公司負責人，並展示戶口存款有近8,000萬元，又吹噓與曾志偉，苗僑偉等人相熟，結果佢喺短短兩個月內以生意周轉不靈、冇錢買機票、陪女友流產等藉口，向原訴人借咗超過一百萬元。據稱當時陳志遠正與前線球彩台女主播陳思琦(Rita)交往，記者向佢查問時，Rita指對方自稱係馬主之子，但就經常向佢借錢，金額逾百萬元，但由於每次借錢只收現金，冇銀行過戶嘅證據，雙方因而分手。
同年，陳思琦遭前男友陳志遠持刀禁錮12小時，對方要脅要同歸於盡，結果陳志遠被判入獄28個月，留有案底。(相關新聞﹕http://bit.ly/2zojaJt)
《蘋果》日前致電陳思琦，佢表示與陳志遠已經冇聯絡，但要澄清兩人並冇拍過拖，佢話﹕「佢唔係我男友！當時我只知佢係財政比較有問題。(有金錢糾紛？)唔止我，仲有同好多人，但佢係利用人哋善心，欺騙咗好多人，詐騙人嘅金錢，即老千囉簡單講。」Rita直認自己都有閃失﹕「我係其中一個受害者，唔係咁好彩，當時我又獨居，係一個好好嘅對象，而且做幕前就慘啲，呢啲真係做幕前辛酸。我當時都係以一個朋友咁舒解佢嘅財困，點知出到嚟自己損失金錢，仲破壞我名聲。(還咗錢未？)從來沒有。」
早前嘉倩BB好開心咁喺ig限時動態，拎住張投注額達三千元嘅賽馬投注，唔知係咪由「馬主之子」陳志遠教佢。對於嘉倩BB同陳志遠正發展中，陳思琦表示不願置評，而嘉倩BB就一直未有回覆。
更多娛聞，喺晒《娛果》
http://fb.com/appledailyent
