近年集中火力發展電影事業、差不多有年半冇新歌出嘅劉浩龍（師兄），新作品《不一定》終於喺日前派台。師兄早排拍咗MV，相比以前嗰啲黑沉沉嘅MV風格，《不一定》MV揀喺好光、扮家居嘅工作室拍攝，師兄話：「《不一定》係一首成熟嘅失戀情歌，同以前嘅失戀情歌唔同。拍拖唔喺自己控制範圍內，情侶分手未必因為有第三者出現，可能係現實問題同性格分歧，例如其中一個諗得比較長遠，想結婚生仔，但另一半就卻跟唔上步伐。」

導演喺其中一幕要求師兄要流真眼淚，估唔到師兄啲眼淚又真係可以「隨傳隨到」，佢話：「我曾經喺《火花不等人》MV喊過，當時MV導演葛民輝要求我喊，劇組所有人都望住我，我就睇書醞釀情緒，滴到第一滴眼淚嗰刻，真係好開心！阿葛事後教我，當我喊到之後，唔應該開心，要繼續沉淪。我經過呢8年演戲嘅沉澱同理解，又諗起阿葛嗰番話，今次就易好多。」

師兄話要多謝陳詠謙填詞，佢笑話：「如果將首歌聽多10次8次，就會明白歌詞意義。我對文字理解能力較差，要錄到第5日先領悟到個意思，實在要感謝舒文對我嘅耐性。」


個MV其實都好sad但同師兄以往啲MV相比，已經叫「光猛」咗。