講起何師奶吳若希，喺今年4月已經為當時仍係男友嘅Alex Ho誕下B女Giselle，產後佢專心湊女，不時喺社交平台晒育兒生活，不過佢都復出得好快，4月生，9月已經見佢首現身公開活動。圈中有唔少星媽都係產後極速復出，首推係名模周汶錡，佢喺今年3月誕下細仔Avner後，坐完月就已經火速收身復出開工。其實佢喺前年陀大仔Jacques時，都已經肥肚唔肚人，產後同樣好快可以復工。
至於同樣喺今年3月生B嘅港姐冠軍張名雅，佢生咗囝囝蔡浚鏗（Mario），又係唞咗一個月左右就已經可以復出，佢當時話自己陀B期間都唔係肥咗好多，加上散步同健身，所以產後瘦得好快。
而今年初為黃曉明一索得男「小海綿」嘅楊穎（Angelababy），又係喺產後數月，已回復少女身形，仲着透視裝為著名時裝雜誌大陸版影封面，化身小貓女嘅Baby，獲讚「美得無話可說」。
仲有混血名模Jessica C.（JC），佢喺舊年3月為時任男友安志杰（Andy）生下B女Tessa，到同年6月已經一家三口返香港，至6月中已見JC出席公開活動，當時佢雖然收起招牌「警鐘胸」，但身形唔會比佢懷孕前輸蝕。
 （資料圖片） |  周汶錡生完二仔後極速收身復出 |  隔多一排見佢，又再瘦啲。 |
 同一件衫，張名雅產前同產後着，請搵分別處…… |  Baby生完小海線後，好快回復做女時身形。 |  |
 JC個肚明明都好大吓，但好快就回復番以前咁樣。 |
