現年34歲的王浩信和老婆陳自瑤（YoYo）屢傳婚姻現暗湧，日前兩人孖咇出活動搵真銀闢謠，王浩信為息風波更事先張揚會陪囡囡面試小學。然而，事實卻是另一回事，大前日YoYo單拖湊女去土瓜灣直資學校面試，在這個重要的日子，身為父親兼老公的王浩信竟然無影無蹤，只隔空鼓勵囡囡考小學！

下月11日是王浩信和陳自瑤的結婚6周年紀念，當年兩人奉女成婚，YoYo嫁給細自己兩年的王浩信，女兒靖喬現在已經5歲。近年王浩信事業起飛成為新一代「師奶殺手」，更有機問鼎無綫視帝，惟因工作忽略了家庭，加上傳跟蔡思貝「開房」打邊爐。上周兩公婆孖住出活動闢謠，王浩信更預告會陪囡囡面試小一，但大前日讀者Ricky透過《蘋果》「爆相爆片」，直擊只有YoYo一個人湊女面試。

■王浩信昨日承認因工作忙，未能陪囡囡去面試，再次許諾第二輪面試一定到。■王浩信上周孖老婆陳自瑤出活動搵真銀兼闢謠。資料圖片

網上貼圖撲火

讀者在電話表示，大前日早上11時在土瓜灣一家小學門外遇見YoYo母女，但老公王浩信就唔見影。戴黑超的YoYo神情嚴肅，讀者說：「見唔到王浩信呀，佢哋喺門口等咗15分鐘左右，全程冇乜點笑。其實我都唔係第一次見到佢哋，幾個月前喺將軍澳一間學校都見過佢哋，嗰次都係見唔到王浩信。」
對於沒有陪囡囡去面試，前日王浩信回覆傳媒解釋因要開工，所以由太太帶囡囡去面試：「啱啱同佢哋去咗個短程旅行，一有時間就陪番佢哋多啲啦！不過都希望其他讀者唔好偷影小朋友，唔想影響佢返學，唔該晒！亦多謝大家關心！」

＿