【勇者無懼 之 刺身淘寶攻略】 香港人淘寶買嘢買得多，但你淘過魚生未先？未試過都唔好話俾人知你識淘寶。



喺大陸淘寶好正，方便過香港，好多時都會包郵，唔包嘅話只係5、6蚊郵費，而且好快送到，今日比錢，聽日到貨。曾經講過，社長到訪過杭州嘅浙江大學exchange，咁初到新國家，梗係要乜都試嚇，所以我同另一個香港人室友就膽粗粗，試下嗌刺身。好多人話我痴狗線，但其實只要有策略就得。


Step 1：如果唔想死，要搵間多人買同多評價嘅。或者你會話，淘寶啲店成日買假好評咖喎，所以你需要睇埋相，啲人會貼刺身實拍照，有圖有真相。我睇過有啲 comment話魚生發曬黑，流曬汁好似屍水咁，睇見都唔開胃，即刻轉買第二間。



Step 2：睇地址。店鋪地址好緊要，一定要最近，唔通你住杭州但去淘烏魯木齊甜蝦咩，運到都變熟蝦啦，所以勸告「勇士」必須搵返間近近地。佢地興樣野叫「同城發貨」，即係相同城市先賣比你，確保食物質素，當然都會有例外。我喺杭州，咁我就揀返發貨地喺杭州嘅刺身店，會安全啲。不過如果你十年都唔返次大陸，又想試下玩命嘅話，深圳發貨，最快24小時後到香港，你啲北寄貝啊、吞拿魚啊，係中轉站等咗十個八個鐘，再同其他衫褲鞋包裹擗曬上車，UN下UN下，第二日就運到你屋企供你享用。




﹝運送時間﹞：服務老練，快捷方便。其實同城就好快嘅，朝早8點落單，1點咗右就會打比你，叫你落樓收貨，如果係遠少少就唔清楚，估計應該都係當日內。


﹝包裝情況﹞：封口嚴密，大方平實。用發泡膠盒入住，外麵包到實曬，都算硬淨。而入面會放冰冷藏，所以即使落單後五個鐘先收貨，刺身仍然保持冰冷，總好過食明將熱壽司啦。


﹝價錢﹞：三文魚60人仔有400克左右，極厚切，約25片。甜蝦1蚊1隻，不過好細條。北寄貝好似幾蚊一舊。我地買咗一客三文魚、30隻甜蝦、幾舊北寄貝。



〈開箱實況〉


一打開包裹，甜蝦同北寄貝，外表正常，冇發黑，放落口不過不失啦，食北寄具果陣，咪當自己食緊擦字膠囉，以前日本仔打到嚟都係食樹皮咋嘛。至於甜蝦，其實冇咩味，唔知食緊乜，不過算啦好過拎去餵狗。




甫見三文魚，滿心歡喜。魚肉結實，色澤紅潤，睇到都開胃，咬下去鮮魚香，湧上心頭，真係唔差，如果係openrice我會比10個lam lam 脷。佢好厚身，咬落去富有口感，你唔需要吝嗇每一口，大啖大啖，以為自己食緊雞脾，用自己嘅雙手撕開血肉，一時迷失在原始的慾望中，回頭無岸。


我同roommate對視，勝利眼神，四目交投，我地訝異，原來生命就是如此簡單，在青蔥歲月中，銘下這份勇氣。一片淘寶三文魚，彷彿是成長印記，在異國淘魚生，每一啖也是靈魂抗爭，吞嚥著滄桑。



「不如下次再淘囉？」


roommate晃晃手上最後一片魚生，依依不捨，若有所思。




個零月後，我地又淘多次，只淘三文魚。你可能覺得戇尻，但唔止咁，今次我地好激動，一人啪一盒。


一如既往，落單、收貨、享用，嚥嚼期間，我似乎發現了甚麼。


「嘩！頂你個肺，有骨嘅？」



他卻毫不驚訝，慢慢地享用著。畢竟這裡，國民活著，變得空洞又麻木，生活的便利磨蝕了理性。


我恍然大悟，將吃剩的贈給他，回頭就走，不久便返港了，那刻，我是浪子。此後我們再也沒有淘過刺身。一根魚骨，劃破了青春憧憬，戳穿了勇氣的夢幻泡影。


從此，每次在香港見到所謂「淘寶達人」、「開箱勇士」，我都笑而不語，徐徐回想起在異鄉勇敢淘過的三文魚⋯⋯