【女怕嫁錯郎】一場婚禮，先睇清楚個老公係咩人！！
同老公拍拖多年，啱啱結完婚渡完蜜月回來。拍拖時佢已經話父母預咗筆錢俾佢結婚擺酒，所以一早講好咗，除咗擺酒嘅錢，其他費用同佢攤分。
到搞結婚嗰時，我哋都用個excel 記好哂啲數，方便之後埋數。除咗蜜月旅行，佢話請我去，我都主動話負責返當地駛費同其他雜費。
好哋哋一直到婚前一晚，99打電話同我講，我請嘅朋友人情要拎返出嚟找酒席錢，當時我好嬲都冇應承，老公氹返我，但聽到佢都係偏向99嗰邊。
然後蜜月時都冇咩嘢，但一落機老公就變臉，大家就坐低傾。佢居然將過大禮時所收到的每封利是嘅銀碼都數落一番，嫌女家封得少，話封$50/$100倒不如封$10，俾乞兒咩？話佢哋封俾司機都$1000啦！
好難聽，我覺得佢係完全侮辱緊我屋企人，點知佢哋鍾意用$1000封利是俾人，而且都係一種心意啫，我哋本身都唔係有錢人家，就算知都跟唔到用$1000封利是啦！而最難聽係，佢覺得我父母用咁少錢封利是係我嘅主意，我先係最貪錢嘅幕後黑手！
最後，佢推翻哂婚前所有約定，話婚禮所有費用都要平分，包括蜜月旅行。而佢之前講嘅「婚宴由男家負責」就變咗做「婚宴由男家負責㨂地方同菜單」⋯聽完我覺得好傷心，都覺得佢個人好陌生，而家先知原來佢可以為錢可以去得咁盡⋯而家日日對住佢好痛苦，因為我都唔知道點樣去面對佢
source:圈圈網
