賭王四房孻仔何猷君上月中被揭與少女標本成員袁紫僑（CoCo）分手一個月，鑽石筍盤「復牌」火速即有新歡，今次對象是比他年長6歲的內地超模奚夢瑤。二人日前被本報讀者目擊蜜遊東京，孖住行《美少女戰士》專門店。前晚，猷君更在四太投資的上海商廈LED外牆，以巨型心心投射示愛，大展浪漫追女手段。

現年22歲的賭王四房孻仔何猷君被外界封為「數學天才」，高富帥的他戀事停不了，近兩年已換畫四次，包括有西甲華倫西亞班主千金Kimmy，上月中，他被揭與少女標本成員袁紫僑（CoCo）分手一個月，當時猷君更表示：「見到終點咪分開。」鑽石筍盤再度「復牌」。


■猷君投女友所好，陪奚夢瑤行《美少女戰士》精品店。讀者提供圖片■奚夢瑤是《美少女》粉絲，曾在Ig表示幻想自己變身。■超模奚夢瑤經常獲國際品牌邀行騷，今年9月她在巴黎為品牌Balmain示範春夏新裝。資料圖片

掃《美少女》精品

分手一個月，猷君又有新戀情，今次對象更上一層樓，是28歲的內地超模奚夢瑤。早前本報讀者Carmen透過《蘋果》爆相爆片，直擊二人現身東京鬧市，從照片見到，戴上口罩的奚夢瑤身穿牛仔外套襯熱短褲，盡顯高䠷身形，而猷君就穿黑色外套。當時兩人在一間專賣《美少女戰士》的精品店內，讀者Carmen表示：「禮拜六（上月14日），見到猷君同個女仔喺一間商場出現，個女仔都好高，幾乎拍得住猷君。個女仔揀緊嘢嗰陣，猷君就好細心同有耐性企喺側邊畀意見，女仔走嗰陣，猷君就跟住喺後面快步跟出去。」
查看奚夢瑤的Instagram，她被讀者捕獲前一日，貼了一張枕頭及床的相片，以英文留言：「嘩，去日本好開心」，再附加四個心心，感受到她與猷君去東京的興奮心情。
猷君追到超模，確實令不少男士羨慕。前晚9時，奚夢瑤在Ig貼了一幅上海尚嘉中心的夜景相，特別在大廈的LED外牆有一個巨型紅色心心，而該大廈的投資者就是四太梁安琪私人公司尚嘉的旗下項目，令人聯想到猷君大搞浪漫示愛，奚夢瑤更留了「24」數字，而她距離上次在Ig貼文至前晚，剛好相隔24日，本來猷君亦有給「LIKE」，更留了一個心心emoji公仔回應，不過隔了一晚，他又忽然刪走留言。

【上海】
■奚夢瑤前晚在Ig貼上四太旗下商廈外牆的LED心心相，疑是猷君出冧招。		■四太昨在電話表示鼓勵猷君（左）拍拖。資料圖片

四太贊成拍拖

本報記者昨聯絡過猷君及其舊愛CoCo，惟二人在截稿前均未有回覆。至於四太對兒子猷君撻着超模就表示不知情：「係朋友定女朋友唔知，自己太忙，冇聽到個仔話拍拖，其實後生仔呢個年紀應該拍拖。」提到猷君疑似在她的上海商廈玩LED投射心心示愛，四太表示：「據我所知，公司唔會攞呢啲資源出嚟。」
採訪：王梓嫚、唐如

■猷君與CoCo甩拖一個多月。資料圖片■奚夢瑤（右）上月為劉嘉玲的上海時裝騷行騷。資料圖片